Boleh juge ni ari kebanyakan orang bilang, anak post millenial demen cuma main gejet doang. Tapi kagak sale juge kalo ada nyang ngomong, anak-anak nyang sekole di Tanah Betawi, demen baca puisi.
Coba aje liat ape nyang dikerjain Lembaga Kebudayaan Betawi ame Dinas Pendidikan DKI Jakarta dan Dinas Kebudayaan DKI Jakarta. Ketige lembaga ini bikin lombe bacain puisi virtual buat siswa tingkat SD/MI, SMP/MTs, SMA/MA/SMK/Universitas. Lomba ni disokong Bank DKI ame PD Pasar Jaya dengan tema: “Nasionalisme dan Berbudaya Melalui Literasi.”
Gawean nyang digelar sejak September-Oktober, ude diumumin pemenangnye, di ari Jumat, 22 Shafar 1442H (09/10) di Lobi Dinas Pendidikan DKI Jakarta.
Nyang ikutan lomba ade sekitar 185 peserta tingkat SD/MI, 280 peserta usia tingkat SMP/MTs, dan 122 peserta usia SMA/MA/SMK/Universitas. Pesertanye anak sekolah nyang tinggalnya di Jakarte.
Ade dua puisi nyang dibacain: puisi wajib ame puisi pilihan. Nyang wajib puisinye dari karya-karya yang berbah perjuangan dari Chairil Anwar, WS Rendra, atawe Taufik Ismail. Sedangkan puisi pilihan, pilihan puisi karya para penyair Betawi nyang kiprah kepenulisannye cukup mencorong, macam Susy Aminah Aziz, Tuty Alawiyah AS, Zeffry Alkatiri, Yahya Andi Saputra, Rizal, Fadjriah Nurdiarsih, Rachmad Sadeli, Sam Mochtar Chaniago, dan lain-lain.
Di lokasi acare, Iwan Henry Wardhana, Kepala Dinas Kebudayaan DKI Jakarta, bilang kalo die sangat berterima kasih kepada Lembaga Kebudayaan Betawi nyang jadi inisiator hajatan ini. “Meski di tengah pandemi, tapi ide-ide dan kreativitas ternyata memang tetap berjalan. Apalagi animo peserta terhadap acara ini juga sangat besar. Banyak di antara generasi muda, bibit anak-anak sekolah, yang punya jiwa dan bakat di bidang kesenian,” ujarnya.
Apresiasi juga dateng dari Nahdiana, Kepala Dinas Pendidikan DKI Jakarta, nyang namanye dijadiin name piala buat kategori SMP. Katanye, kegiatan lomba baca puisi virtual ini macm gini kudu terus ditingkatin dan punya dampak positif.
“Dengan diadakan lomba puisi ini, anak-anak ini belajar mengapresiasi diri mereka. Anak-anak punya aktualisasi diri yang sangat baik, berani tampil di depan umum, dan menjadi juara. Hal ini sesuai dengan misi pendidikan yang tuntas berkualitas. Artinya, kita tidak ingin mengungkung anak-anak pada satu bakat atau talenta. Kita tidak ingin anak-anak belajar pada pada apa yang diberikan oleh guru. Kita dorong anak-anak menemukan minat dan bakatnya,” ujar Nahdiana serius.
Penghormatan Bakal Bang Ipul
Beky Mardani, Ketua Lembaga Kebudyaan Betawi, ide kegiatan ini datengnya dari Alm.Saefullah, Sekda DKI Jakarta. Sebagai tokoh Betawi nynag makan asem garem dunia pendidikan, Bang Ipul—sapaan akrab Saefullah— emang peduli bener dengan upaye ngegali kebudayaan Betawi bakal generasi muda.
“Itulah sebabnya, sebagai penghormatan, piala untuk pemenang tingkat SMA/MA/SMK/Universitas, kita dedikasikan untuk Bang Ipul. LKB juga berharap acara lomba baca puisi virtual ini bisa diadakan setiap tahun,” ucap Beky.
Pemberian hadiahnye diadain Jumat, 20 Shafar 1442 H (9/10/ 2020) di Aula Dinas Pendidikan DKI Jakarta secara drive thru. Ade 33 pemenang dari tiap kategori, yaitu juara 1, 2, dan 3; juara harapan 1, harapan 2, dan harapan 3; 5 juara terpuji; serta juara favorit nyang pade dateng dianterin orang tua atawe guru pendamping.
[